Рақобат қўмитаси очиқлик борасида етакчи: 2025 йил рейтингида 1-ўрин
Республика баҳолаш комиссияси томонидан эълон қилинган 2025 йил якунларига кўра, Рақобат қўмитаси давлат органлари ва ташкилотлари ўртасида очиқликни таъминлаш бўйича Очиқлик индекси рейтингида юқори натижа қайд этди. Қўмита 90,9 балл тўплаб, нафақат республика миқёсида юқори ўринни эгаллади, балки давлат қўмиталари орасида 1-ўринни қўлга киритди.
Ушбу натижа Рақобат қўмитасининг жамоатчилик билан очиқ мулоқот ўрнатиш, фаолияти ҳақида тўлиқ ва ишончли ахборот тақдим этиш борасида олиб бораётган тизимли ишларининг амалий самарасидир. Қўмита доимий равишда ахборот ошкоралигини таъминлаш, маълумотларнинг очиқлигини кенгайтириш ва фуқаролар учун қулай ахборот муҳитини яратиш устида ишлаб келмоқда.
Мутахассислар таъкидлашича, давлат органлари фаолиятидаги очиқлик ва шаффофлик жамият ишончини мустаҳкамлашда муҳим омил ҳисобланади. Аҳоли давлат идоралари фаолиятидан қанчалик хабардор бўлса, уларга бўлган ишонч ҳам шунчалик ортади.
Шу ўринда, Рақобат қўмитаси жамоатчилик, оммавий ахборот воситалари вакиллари, журналистлар ва блогерларнинг фаол иштирокини алоҳида эътироф этади. Уларнинг холис ва тезкор ахборот тарқатиш борасидаги саъй-ҳаракатлари рақобат муҳитини ривожлантириш, шунингдек, истеъмолчилар ҳуқуқларини ҳимоя қилишда муҳим аҳамият касб этмоқда.
Хулоса қилиб айтганда, Рақобат қўмитасининг мазкур ютуғи нафақат бир идоранинг муваффақияти, балки мамлакатда очиқлик ва шаффофлик тамойилларини қарор топтириш йўлидаги муҳим қадамлардан бири сифатида баҳоланади.
