Европол хабарига кўра, болаларни жинсий эксплуатация қилиш бўйича 2 миллион фойдаланувчиси бўлган энг йирик платформа – Kidflix йўқ қилинган.
Унда ёзилишича, Европа мамлакатларининг ҳуқуқни муҳофаза қилувчи органлари Европа Иттифоқининг Ҳуқуқни муҳофаза қилиш соҳасидаги ҳамкорлик агентлиги (Европол) кўмагида Stream код номли халқаро операция ўтказган. Натижада болаларга нисбатан жинсий зўравонлик акс этган материалларни тарқатишга ихтисослашган йирик платформалардан бири бўлган Kidflix фаолияти батамом тўхтатилган.
Қайд этилишича, тергов бошланган 2022 йилнинг апрель ойидан бутун тахминан 1 миллион 800 минг фойдаланувчи ушбу платформада рўйхатдан ўтган. Жорий йилнинг 11 март куни Германия ва Нидерландия ҳукумати Kidflix серверини мусодара қилгач, унда 72 мингга яқин видеофайл мавжудлиги аниқланган.
Ҳозиргача 1393 нафар гумонланувчининг шахси аниқланиб, тақиқланган материалларни тарқатишда иштирок этган 79 кишининг ҳибсга олингани айтиляпти. Тергов давомида жабрланган 39 нафар вояга етмаган бола эса ҳимояга олинган. Шу жараёнда 3 мингдан ортиқ электрон қурилмалар мусодара қилиниб, 91 мингдан ортиқ ноёб видеофайллар топилган.
Шу ўринда ушбу платформа фойдаланувчилари нафақат видео юклаб олишлари, балки жонли эфирлар олиб боришлари ҳам мумкин бўлганини айтиш жоиз. Материалларга кириш токен тизими орқали амалга оширилган – токенлар контентни юклаш ва текшириш эвазига ишлаб топилган. Тўловлар эса криптовалюта орқали амалга оширилган.
Яна бир далил: платформадаги видеолар бир нечта сифатда бўлиб, бу фойдаланувчиларга материалларни олдиндан кўриб чиқиш ва юқори сифатдаги версиясини очиш учун тўлов қилиш имконини берган. Мутахассислар таҳлили 2021 йилдан бери платформа фойдаланувчилари жами 91 мингдан ортиқ видеони, умумий давомийлиги 6 минг соатдан ошиқ материални юклаганини кўрсатяпти.
Европол мутахассислари томонидан ўтказилган операцияда 35 дан ортиқ давлат иштирок этгани қайд этилган. Жумладан: ушбу операцияда Германия, Нидерландия, Франция, Италия, Испания, Бельгия, Австрия, Австралия, Канада, АҚШ, Буюк Британия, Польша, Швеция, Дания, Финляндия, Ирландия, Чехия, Болгария, Янги Зеландия, Норвегия, Португалия, Швейцария, Руминия, Сербия, Латвия, Литва, Эстония, Греция, Хорватия, Мальта, Люксембург, Албания, Колумбия, Грузия ва Кипр фаол қатнашган.
